| |
À mezu à i sullioni è i bagni chì portanu pocu à raghjunà, hè rara ch'elli naschinu i dibattiti è ch'elli si veghinu i mubilizazioni di fondu. Ma un bellu cuntrastu di quisti l'hà fattu nascia a BNP, nantu à u sughjettu di a custruzzioni in Corsica è di u pusessu di l'isula. Ramintemu i fatti, chì sò stalvati in dui ghjorni soli : u prima, a BNP annunciava cù gran piacè in a stampa ch'ella criava i imprestiti spiciali da aiutà i stranieri chì volinu custruiscia in Corsica — è micca par campà ci l'annata sana. Di sicuru era issa banca di bona fedi è pinsava di fà da bè, di renda un sirviziu duvutu à i clienti è basta. D'ogni manera, ùn si trattava di crià calcosa di novu novu, ma di stenda à a Corsica i pruposti ch'ella faci a banca in l'Auropa sana.
U ghjornu di issu articulu à puntu era quillu di a riunioni indipindista di Corti, duv'ella fù subitu dinunciata issa pruposta. U dopu ghjornu fù uccupatu u lucali di a banca in Bastia, è a sera stessa a dirizzioni naziunali annullia tuttu pà a Corsica, dendu li cusì un istatutu particulari in Auropa almenu par ciò chì tocca à i so imprestiti.
Palesa issa storia una sfarenza d'idei è di cuncipitura di u mondu. Si pò capiscia ch'ella abbiinu trovu ghjustu i dirittori di a banca di fà in Corsica cum'è altrò. A tempu issa scelta lascia veda una ignuranza straurdinaria di u pesu ch'ellu hà issu prubulema in Corsica, da seculi è seculi, è ancu di più ind'u nostru è da calchì annu. Era ancu più piriculosa a spiicazioni chì ci vulia à pinsà à i stranieri par via di a dumanda troppu poca di i Corsi par acquistà tarreni o casi. Cumu saria forti issa dumanda, sapendu i prezzi di issi tarreni è casi è ciò ch'elli vincinu l'isulani in ginirali ? Ramintemu chì in Corsica 53 % di famigli ùn sò ricchi à bastanza par pacà impositi (40 % in a Francia sana), chì u rivinutu mediu hè di 17 % più debuli cà u naziunali, chì a sfarinziazioni suciali hè più forti cà in l'Isula di Francia (ricevinu 8 volti di più i 10 % piu ricchi cà i 10 % più povari), è chì 30 000 parsoni campanu cù dificultai (trà disuccupazioni, RMI, paghi bassi) ?
Di sicuru i prubulema par cumprà o fà si una casa, si scuntraranu ancu in cuntinenti, vicinu à u mari, si sà, è ancu in certi lochi di l'internu o di a muntagna, duv'elli compranu assai l'Inglesi par u indittu. Ma à tempu in Corsica veni cuncirnatu tuttu un tarritoriu isulanu chjucu cù una identità forti, è ligata assai cù a quistioni di a tarra. Issu sughjettu cù quillu di a lingua fù da sempri u tema maiò di u naziunalisimu, chì li si hè datu cusì una uccasioni di mubilizazioni è di vittoria. Si cunnosci l'idea di legi nova chì ùn parmittaria di cumprà cà à quilli chì in Corsica ci campanu da deci anni, veni à dì chì i clienti privisti da a BNP ùn ci intrarianu mancu à pena. I legi cusì ci sò in certi lochi d'Auropa, masimu isuli, ma chì ci eranu prima di l'unioni aurupea, è cù i statuti più « particulari » cà u nostru. S'omu voli circà suluzioni ligali, ci voli à rifletta à cum'elli si pudarianu accuncià dicisioni di issu genaru cù i testi francesi è aurupei, senza sunnià d'impona una legi altra in cuntraddizzioni cun elli.
Un dibattitu veru nantu à issu tema d'ogni manera ùn si pudarà chisià. Ùn basta à risponda colpu à colpu à situazioni di crisi, nati da dicisioni pigliati da unu è da l'altru è à i mubilizazioni chì ni nascinu. Issu dibattitu ci vularia ch'ellu fussi sirenu è sinnatu. In issa storia di a BNP certi militanti dicianu à a radio : altrò hè altrò, è quì hè quì. Dittu di modu troppu semplici hè dinò quistu u puntu. Finu à induva pò un gruppu umanu sceglia i so stradi spicifichi ind'a mundializazioni par mantena i so dritti, a so cultura, par chì a ghjenti possi campà in leia cù a so tarra ? Vali a dumanda pà a Corsica, ma ancu pà i nazioni cum'è a Francia, è puri par l'Auropa sana.
| |
tempifa 
